V085T194 V085P206
[Da Copia dattilografata - vi sono alcune aggiunte di pugno di Don Orione]
20 /1/ [1]939 - XVIII – Milano
(per l’Ufficio Stampa)
“Al carissimo Sen. S. E. Stefano Cavazzoni per ringraziarlo d’avere aperto anche a me la porta di una Casa Miracolosa” - aff.mo L. Medici -
Piccolo Cottolengo Milanese: “L’à c’è la Provvidenza!”
“Chi l’è? de dove el ven? de chi l’è fioeu?
Che fed el g’ha? In doe l’è che l’è nassuu?
Quand?…Di?…Ann?… Sussidi, ghe n’ha avuu?
Che mestee el fava?…Come el viv incoeu?…..
Tutt va scritt e trascritt; e la domanda
la va; la gira in alt e in bass; la gira.
E passa la giornada, e ven la sira
e la carta la gira e la se sbanda;
e quel là, per avegh on tocck de pan,
on lett, la medesìna, ona casacca,
el corr, el briga, el vomita, el saracca,
col gel vioeula ch’el ghe spong i man.
“La carità la gh’è, car el mé omm,
e granda e bondaziosa e bona…ma...
gh’è i uffizi che deven controllà
sui “perché”, su la vita, sui “percomm”...
V085P207
E se capiss. L’è giust. Quand on bigliett
el saluda el borsin o el portafoeui
per no vegh el spavent de resta a...moeui,
el voeur vedé‚ in che bus el se va a mett.
Ma chi la Providenza non la manca.
Vun el g’ha fam?…El picca, el ven de dent...
Chi el troeuva on tocch de pann, bianh e fument,
che a nissun el ghe costa ona palanca...
Riva vun, che gh’ha minga da durmì?
(Ma manca el lett). Nagotta. Mai casciass!
Ecco on carr, coi covert e i materass,
e no gh’è ch’el disturb de fermass chi.
Riva on malaa, che l’ha giraa de nott,
per trovà on poo del cald e on tocch de branda?... (l’Ospedale Maggiore)
(El g’ha minga la fever - La “Ca’ Granda”
per quest l’è ciappa no - ma l’è tutt rott;
el topicca, el baredella, el ne po più;
el sa pu’in dove andà; l’è come on strasc...)
Ebben chì gh’è el Signor ch’el slarga i brass,
e se troeuva on canton anca per lu.
Donn e omen; bagai, vecc, bonn e gramm,
de chì, de tutt el mond, san o malaa,
se gh’è on bus (e de bus ghe n’han già fàa)
se po’ trovà ona branda e scoeud la fàmm.
V085P208
Se po’ trovà on rimedi, ona coverta;
se po’ trovà quella parola bona,
che dà pas, che risana e che perdona,
in la miseria de sta vita incerta.
E i cunt? i ciav? i liber? i inventari?
Dov’hin i magazzin del pan, del ris?
Vattelapesca Hin forsi in Paradis
sti ragionatt di “fond” immaginari?!...
Ma Renzo el dis “La c’è la Provvidenza!”
Si si la gh’è. Lè lèe che fa i lett;
che slarga i pagn; che fabbrica i micchett,
per tutti quii che ciamen assistenza.
Chì dove el viv el batt, come on arteria
sott e l’ondada di passion del coeur,
per vegh ona carezza no ghe voeur
che una tessera sola: “La Miseria”
L. Medici